படகு மூலம் பிரான்ஸ் ரீயூனியன் தீவை அடைந்து சட்டவிரோதமான முறையில் பிரான்ஸுக்குள் நுழைய தயாராக இருந்த இரண்டு இலங்கையர்கள் செவ்வாய்க்கிழமை (25) இலங்கைக்கு நாடு கடத்தப்பட்டுள்ளதாக டெய்லி நியூஸ் செய்தி வெளியிட்டுள்ளது.
ஆரச்சிக்கட்டுவ, பலுகஸ்வெவ பிரதேசத்தைச் சேர்ந்த 21 வயதுடைய இளைஞர் ஒருவரும், பங்கதெனிய, சின்னக்கருவைச் சேர்ந்த 49 வயதுடைய பெண்ணொருவருமே இவ்வாறு நாடு கடத்தப்பட்டுள்ளனர்.
2018ஆம் ஆண்டு இறுதியில் சிலாபத்தில் இருந்து படகு மூலம் பிரான்ஸ் ரீயூனியன் தீவுக்கு சென்றதாகவும், பல்வேறு காரணங்களை கூறி அண்மைக்காலம் வரை அங்கு தங்கியிருந்ததாகவும் தெரிவிக்கப்படுகிறது.
இதேவேளை, சட்டவிரோதமான முறையில் ஜப்பானுக்குள் நுழைந்து 11 வருடங்களாக அங்கு வசித்து வந்த ஒருவரும் செவ்வாய்க்கிழமை (25) இலங்கைக்கு நாடு கடத்தப்பட்டுள்ளார்.
2011ஆம் ஆண்டு இரகசியமாக ஜப்பானுக்குச் சென்ற 37 வயதுடைய நபர், நொச்சியாகம, உடுநுவர கொலனியில் வசிப்பவர் என அடையாளம் காணப்பட்டுள்ளார்.
கட்டுநாயக்க பண்டாரநாயக்க சர்வதேச விமான நிலையத்தை வந்தடைந்தவுடன் குற்றப் புலனாய்வு திணைக்கள அதிகாரிகளால் மூவரும் கைது செய்யப்பட்டுள்ளனர். (யாழ் நியூஸ்)