இலங்கையில் தற்போது 40 வகையான மருந்துகள் உட்பட பல அத்தியாவசிய மருத்துவப் பொருட்களுக்கு தட்டுப்பாடு ஏற்பட்டுள்ளதாக இராஜாங்க அமைச்சின் செயலாளர் டொக்டர் சமன் ரத்நாயக்க தெரிவித்தார்.
நாட்டில் உள்ள வைத்தியசாலைகளுக்கு 1,325 வகையான மருந்துகள் வழங்கப்படுவதாக தெரிவித்த ரத்நாயக்க, அவற்றில் 400 அத்தியாவசிய மருந்துகள் எனவும், 10 உயிர்காக்கும் மருந்துகள் எனவும் தெரிவித்தார்.
தற்போது தேவைப்படும் 40 வகையான மருந்துகளில் சில அத்தியாவசிய மருந்துகள் இதயத்தில் இரத்தம் உறைவதைத் தடுக்க உதவுவன என ரத்நாயக்க தெரிவித்தார்.
அமெரிக்க டொலரின் விலை அதிகரிப்பு காரணமாக மருந்துகளுக்காக ஒதுக்கப்பட்ட வரவு செலவுத் திட்டம் போதுமானதாக இல்லை என அவர் சுட்டிக்காட்டியுள்ளார்.
மருந்துப் பொருட்கள் வழங்கல் மற்றும் ஒழுங்குமுறைக்கான இராஜாங்க அமைச்சின் செயலாளர், மருந்துகளை கொள்வனவு செய்வதற்கான ஒதுக்கீட்டை அதிகரிக்க கோரிக்கை முன்வைக்கப்பட்டுள்ளதாகவும், அதற்கான பதிலுக்காக காத்திருப்பதாகவும் தெரிவித்தார். (யாழ்
நியூஸ்)